ممبئی (اُردو پوائنٹ اخبارتازہ ترین – اے پی پی۔ 20 جنوری2025ء) بالی وڈ اداکار سیف علی خان کو چاقو کے وار کر کے زخمی کرنے کے الزام میں گرفتار مشتبہ شخص نے اقرار جرم کر لیا ہے۔این ڈی ٹی وی کے مطابق 30 سالہ بنگلہ دیشی شخص کو اتوار کے روز گرفتار کیا گیا تھا، جس کے بعد اس نے پولیس کو بیان میں کہا ہے کہ ’ہاں، حملہ میں نے کیا ہے۔رپورٹس میں پولیس ذرائع کا حوالہ دیتے ہوئے بتایا گیا ہے کہ محمد شریف الاسلام شہزاد کو ممبئی کے علاقے باندرا جہاں سیف علی خان کا گھر واقع ہے، سے تقریباً 35 کلومیٹر دور گرفتار کیا گیا۔جمعرات کو ہونے والی اس واردات کے بعد سے پولیس تیزی سے ملزم کا سراغ لگانے کی کوشش کر رہی تھی۔پولیس کا کہنا ہے کہ پکڑے جانے کے بعد جب ایک سینئر ر اہلکار نے ملزم سے پوچھا کہ کیا اس نے سیف علی خان پر حملہ کیا تو اس نے کہا کہ ’ہاں، میں نے کیا ہے۔
(جاری ہے)
پولیس نے ایک لیبر کیمپ کے ٹھیکیدار کی مدد سے ملزم کا سراغ لگایا۔پولس کے مطابق اس کے ساتھ ہی 100 اہلکاروں پر مشتمل ٹیم کو بھیجا گیا اور سات گھنٹے تک سرچ آپریشن جاری رہا۔
ذرائع کا کہنا ہے کہ ملزم جھاڑیوں میں چھپا ہوا تھا، جس کو گرفتار کر لیا گیا ہے اور مزید تحقیقات ہو رہی ہیں۔اداکار سیف علی خان پر گھر میں گھس کر حملے نے ملک کی فلم انڈسٹری اور ممبئی کے رہائشیوں کو پریشان کر دیا ہے۔ شوبز شخصیات اور ممبئی کے رہائشی بہتر پولیسنگ اور سکیورٹی کا مطالبہ کر رہے ہیں۔فلم سٹار پر ہونے والے حملے میں ان کے ہاتھوں اور گردن پر گہرے زخم آئے۔ ڈاکٹرز کے مطابق ان کی حالت خطرے سے باہر ہے اور انہیں ہسپتال سے ڈسچارج کیا گیا ہے۔
