آئی سی سی نے ٹی ٹوئنٹی ورلڈ کپ کے پہلے راؤنڈ کے 26 میچوں کے لیے میچ آفیشلز کا اعلان کر دیا ہے۔ میگا ایونٹ میں پاکستان کے احسن رضا، آصف یعقوب اور راشد ریاض بھی امپائرنگ کے فرائض سرانجام دیں گے۔
ٹی ٹوئنٹی کے پہلے راؤنڈ میں 20 امپائرز اور چھ میچ ریفریز فرائض سرانجام دیں گے۔ آئی سی سی ایونٹ میں پہلی بار 5 امپائرز فرائض سرانجام دیں گے۔
پاکستان کے احسن رضا، راشد ریاض اور آصف یعقوب کو امپائرز کے پینل میں شامل کیا گیا ہے۔ راشدریاض اور آصف یعقوب کو پہلی بار آئی سی سی ایونٹ کے لیے منتخب کیا گیا ہے۔
T20 ورلڈ کپ 2024 کے دیگر میچ آفیشلز میں امپائرز کرس براؤن، کمار دھرماسینا، کرس گفانی، مائیکل گف، ایڈرین ہولڈسٹاک شامل ہیں۔ جے رامن مدنا گوپال، نتن مینن، سام نوگاسکی اور اللہ الدین پالیکر بھی امپائروں کے پینل کا حصہ ہیں۔
جے رمن مدنا گوپال، سام نوگاسکی، اللہ الدین پالیکر بھی پہلی بار آئی سی سی کے کسی ایونٹ میں امپائرنگ کا اعزاز حاصل کریں گے۔
میچ ریفریز میں ڈیوڈ بون، جیف کرو، رنجن مدوگالے، اینڈریو پائی کرافٹ، رچی رچرڈسن اور جوگل سری ناتھ شامل ہیں۔
ٹی ٹوئنٹی ورلڈ کپ یکم جون سے 29 جون تک امریکا میں 3 مقامات اور ویسٹ انڈیز میں 6 مقامات پر کھیلا جائے گا، یہ ٹورنامنٹ امریکا کے گرینڈ پریری اسٹیڈیم میں شروع ہوگا۔ ٹورنامنٹ میں 20 ٹیمیں 55 میچ کھیلیں گی۔
